पत्रकार मण्डलकाे पहलमा सिरहा जिल्लाकै पहिलो चन्द्रघण्टा देवी मन्दिरको उद्घाटन।

शितल साह, चैत्र १५ – सिराहा जिल्लाको धनगढीमाई-१३ परेवा भिरस्थित चन्द्रघण्टा देवी मन्दिरको विधिपूर्वक उद्घाटन सम्पन्न भएको छ। यो मन्दिर धार्मिक, सांस्कृतिक र पर्यटकीय दृष्टिकोणले महत्त्वपूर्ण स्थान राख्दछ।

वर्षौंदेखि संरक्षणविहीन अवस्थामा रहेको चन्द्रघण्टा देवी मन्दिरको निर्माण कार्य धनगढीमाई-१४ का वडा अध्यक्ष अमित ठकुरीको डिजाइनमा सम्पन्न भएको हो। मन्दिर निर्माणको अभियान माघ १ गतेदेखि दाताहरुको भरपूर सहयोग र स्थानीय पत्रकार विनोद मण्डलको विशेष पहलमा सुरु गरिएको थियो।

मन्दिर निर्माणका लागि माघ २१ गते नेपाल पत्रकार महासंघ सिराहा शाखाका पूर्व सचिव शिव दयाल यादव र धनगढीमाई-१३ का वडा अध्यक्ष सूर्यमान तामाङले संयुक्त रूपमा शिलान्यास गरेका थिए। त्यसपछि माघ ३० गते छत ढलान कार्य सम्पन्न भएपछि फाल्गुन १६ गते विधिपूर्वक सेटिङ खोलिएको थियो।

अन्ततः, चैत्र १४ गते धनगढीमाई १४ का वडा अध्यक्ष अमित ठकुरी र १३ का वडा अध्यक्ष सूर्यमान तामाङले संयुक्त रूपमा रिबन काटेर उदघाटनकाे लागि राखिएकाे राताे कपडा हटाई मन्दिरको ढोका खोलेर विधिपूर्वक उद्घाटन गरे। उद्घाटन कार्यक्रममा जिल्लाभरिका पत्रकार, भक्तजन र स्थानीयवासीहरूको उल्लेखनीय उपस्थिती रहेको थियो। उद्घाटन पश्चात् उपस्थित सबैलाई प्रसाद पनि ग्रहण गराइएको थियो।

यस मन्दिरको उद्घाटनले क्षेत्रीय धार्मिक र सांस्कृतिक पुनर्निर्माणमा महत्त्वपूर्ण योगदान पुर्याउने विश्वास गरिएको छ।