सितल साह , लहान, सिरहा बैशाख १० – लहान नगरपालिका–१६ मा २५ लाख रुपैयाँको लागतमा आधुनिक मलामी प्रतीक्षालय निर्माण गरिएको छ। नगरपालिकाले स्थानीयहरुको दीर्घकालीन मागलाई सम्बोधन गर्दै उक्त प्रतीक्षालय निर्माण गरेको हो।
यसअघि मलामीहरु दाहसंस्कारका क्रममा घाम, पानी र अन्य प्राकृतिक समस्याको सामना गर्दै आउनुपरेकोमा अब त्यो समस्या समाधान भएको स्थानीयहरुले खुशी व्यक्त गरेका छन्। नगर प्रमुख महेश चौधरीका अनुसार स्थानीयको मागअनुसार नै प्रतीक्षालय निर्माण गरिएको हो र यसले तीनवटै जिल्ला – सिरहा, सप्तरी र उदयपुर – को सीमाक्षेत्रमा पर्ने मलामीहरुलाई प्रत्यक्ष लाभ पुर्याउनेछ।
प्रतीक्षालयको निर्माणपछि स्थानीयबासीहरु उत्साहित देखिएका छन्। उक्त स्थान सीमाक्षेत्रको खोला नजिकै रहेको हुँदा त्यहाँ दैनिकजसो तीन जिल्लाबाट मलामी आउने गर्दछन। नयाँ संरचनाले उनीहरुलाई विश्राम गर्ने, शीतल बस्न र सुरक्षित रुपमा बस्ने अवसर प्रदान गर्नेछ।
प्रतीक्षालयमा सुविधा विस्तारको क्रममा केही महिनाभित्र टुवेलमार्फत खानेपानीको व्यवस्थासमेत गरिने जानकारी नगरपालिकाले दिएको छ। उद्घाटन कार्यक्रममा वडा नं. १६ का वडा अध्यक्षसहित अन्य स्थानीय जनप्रतिनिधिहरुको पनि उपस्थिति रहेको थियो।
नगरपालिकाले यस्तो जनमैत्री र आवश्यक पूर्वाधार निर्माण गर्दै स्थानीयस्तरमा जनतालाई प्रत्यक्ष लाभ पुग्ने काममा निरन्तरता दिने जनाएको छ।
