औरही गाउँपालिका अध्यक्ष शिवजी यादव धरौटीमा रिहा

सितल साह,सिराहा, १५ चैत्र – सिराहा जिल्लाको औरही गाउँपालिकाका अध्यक्ष शिवजी यादव र दीलिप यादव एक एक लाख रुपैयाँ धरौटी बुझाएर रिहा भएका छन्। यादवमाथि जातीय छुवाछूत तथा मल्लिक परिवारलाई जबरजस्ती उठिबास गराएको आरोप लागेको थियो।

केही दिनअघि पक्राउ परेका यादवलाई आज जिल्ला अदालत सिराहामा पेश गरिएको थियो। अदालतले एक लाख रुपैयाँ धरौटीमा रिहा गर्ने आदेश दिएपछि उनी थुनामुक्त भएका हुन्।

यादवविरुद्ध परेको मुद्दामा उनीमाथि जातीय विभेद र जबरजस्ती उठिबास गराएको गम्भीर आरोप लगाइएको थियो। तर, अध्यक्ष यादवका समर्थकहरूले यो मुद्दा राजनीतिक रूपमा प्रेरित भएको दाबी गरेका छन्। यादव स्वयंले पनि आफू निर्दोष रहेको बताएका छन्।

अदालतको आदेशपछि यादव रिहा भएका छन्, तर मुद्दाको अन्तिम टुंगो नलागेसम्म उनलाई कानुनी प्रक्रियामा सहयोग गर्नुपर्नेछ।