लहान न.पा.का उपमेयरमाथि कार्यकक्षमै कुटपिट दोषीलाई कारबाहीको माग।

सितल साह,लहान, सिरहा चैत १५– लहान नगरपालिकाका उपमेयर रामचरित्र महतोमाथि कार्यकक्षमै आक्रमण भएको छ। बिहीबार बिहान ११:२५ बजे लहान नगरपालिका वडा नं. २२ का वडाध्यक्ष श्याम अधिकारी चाैधरीको नेतृत्वमा आएको समूहले उनको कार्यकक्षमा प्रवेश गरी हातपात गरेको हो।

उपमेयर महतोले गुणस्तरहीन पीपीसी सडक ढलान कार्यको भुक्तानी प्रमाणीकरण गर्न दबाब दिएको आरोप लगाएका छन्। अनुगमन बिना हस्ताक्षर गर्न अस्वीकार गरेपछि विवाद चर्किएको थियो। वडाध्यक्ष श्याम अधिकारी चाैधरीकाे नेतृत्वमा आएका शैलेन्द्र साह, प्रभुनाय चौधरी, कोशिला चौधरी, उपभोक्ता समिति अध्यक्ष साजन चौधरीसहित २५/३० जनाको समूहले कार्यकक्षको ढोका, झ्याल बन्द गरी उपमेयरमाथि आक्रमण गरेको बताइएको छ।

नगरपालिकाको न्यायिक समितिको संयोजकसमेत रहेका उपमेयर महतोमाथि कार्यकक्षमै कुटपिट हुँदा उनका सवारी चालक श्री राम ध्यान महतो र सेवाग्राही राम अवतार महतो पनि घाइते भएका छन्। उनीहरूले उपमेयरलाई जोगाउन खोज्दा आक्रमणकारीहरूले उनीहरूमाथि समेत हातपात गरेका थिए। आक्रमणका क्रममा कार्यकक्ष तोडफोड समेत भएको छ।

घटनाको बेला नगर प्रहरीलाई खबर गर्दा उनीहरू नआएको उपमेयर महतोले बताएका छन्। मेयर महेश चौधरीको आदेश भन्दै नगर प्रहरी मौन बसेको र सहयोग नगरेको आरोप लगाइएको छ। यद्यपि, नेपाल प्रहरीले भने घटनास्थलमा आएर स्थिति नियन्त्रणमा लिएको थियो।

नगर उपमेयरले मेयर चौधरीमाथि तानाशाही शैलीमा नगरपालिका सञ्चालन गर्न खोजेको आरोप लगाउँदै आफूलाई अख्तियारमा फसाउन खोजिएको दाबी गरेका छन्। उनले आफू असुरक्षित रहेको बताउँदै यदि आफूलाई केही भए त्यसको सम्पूर्ण जिम्मेवारी मेयर महेश चौधरीको हुने चेतावनी दिएका छन्।

यस घटनालाई लिएर जनता समाजवादी पार्टी नेपाल, लहान नगर समितिले घोर भर्त्सना गर्दै दोषीहरूमाथि कडा कानूनी कारबाहीको माग गरेको छ। सार्वजनिक पदाधिकारीमाथि कार्यकक्षमै आक्रमण हुनु लोकतान्त्रिक मूल्यमान्यता विपरीत भएको बताउँदै दोषीलाई उन्मुक्ति नदिन सरोकारवालाहरूले माग गरेका छन्। लहान नगरपालिकामा सत्ता संघर्ष चर्किएको संकेत गर्ने यो घटनाले स्थानीय तहमा विद्यमान अनियमितता र राजनीतिक दबाबलाई पुनः उजागर गरिदिएको छ।