एशियन लाइफ इन्स्योरेन्स लहान शाखाद्वारा १७ औं वार्षिकोत्सव भव्यताका साथ सम्पन्न

सितल साह , लहान, सिरहा , २०८१ चैत्र २१ – एशियन लाइफ इन्स्योरेन्स कम्पनी लिमिटेड लहान शाखाले आफ्नो १७ औं वार्षिकोत्सव भव्यताका साथ सम्पन्न गरेको छ। वार्षिकोत्सवका अवसरमा लहान शाखाका प्रबन्धक प्रेम कुमार सिंह(महताे) ले कार्यालयमा केक काटेर उत्सव मनाइएको थियो। साथै, धार्मिक परम्पराअनुसार गायत्री सचेतना केन्द्रका मण्डलि द्वारा  भजन-कीर्तन कार्यक्रमसमेत गरिएको थियो।

कम्पनीले वार्षिकोत्सवलाई अझ अर्थपूर्ण बनाउँदै संस्थागत सामाजिक उत्तरदायित्व अन्तर्गत विभिन्न सहयोग कार्यक्रम सञ्चालन गरेको छ। यस अवसरमा, गायत्री महायज्ञ सञ्चालन गरिरहेका आयोजकहरूलाई खाद्यान्न तथा आर्थिक सहयोग प्रदान गरिएको लहान शाखाका प्रबन्धक प्रेम कुमार सिंह (महतो) ले जानकारी गराएका छन्। वितरण गरिएको खाद्यान्न सामग्रीमा चामल २५ किलोग्राम, चिउरा २० किलोग्राम, भुजा (मुरही) १० किलोग्राम, नुन ५ किलोग्राम, तेल २ लिटर, दाल ५ किलोग्राम सहित आर्थिक सहयोग प्रदान गरिएको थियो।

वार्षिकोत्सव समारोहमा विभिन्न जिल्लाबाट आएका बीमा अभिकर्ताहरू, बीमित व्यक्ति तथा स्थानीय व्यक्तिहरूको उल्लेखनीय उपस्थिति रहेको थियो। कार्यक्रममा लहान शाखा प्रमुख प्रेम कुमार सिंहले केक काटेर औपचारिक रूपमा उत्सवको सुरुआत गरेका थिए। उनले सबै ग्राहक, अभिकर्ता, तथा बीमित व्यक्तिहरूप्रति आभार व्यक्त गर्दै आगामी दिनमा अझ प्रभावकारी सेवा प्रदान गर्ने प्रतिबद्धता जनाए।

एशियन लाइफ इन्स्योरेन्स कम्पनी लिमिटेड १७ औं वर्ष पार गरी १८ औं वर्षमा प्रवेश गरेको सुखद अवसरमा संस्थाले हालसम्म प्राप्त गरेको उपलब्धिहरूलाई सार्वजनिक गरेको छ। हालसम्म कम्पनीले रु. ५ अर्ब अधिकृत पूँजी, रु. ३ अर्ब ३५ करोड ५८ लाख चुक्ता पूँजी, रु. ५७ अर्ब १८ करोड कुल बीमाशुल्क आर्जन, रु. ४४ अर्ब ६८ करोड जीवन बीमा कोष, रु. ४५ अर्ब ३० करोड कुल लगानी, रु. ५ अर्ब ६५ करोड कुल बीमाशुल्क आर्जन (आ.व. ०८१/८२ फागुन मसान्तसम्म), १६ लाख ४२ हजार बीमालेख, १३३ शाखा/उपशाखा, ४४६ कर्मचारी तथा १ लाख १८ हजार अभिकर्ता संख्याको उपलब्धि हासिल गरेको छ।

कम्पनीले हवाई, पर्यटन, जलविद्युत, बैंक, निजी बीमा, पुनर्बीमा लगायतका विभिन्न क्षेत्रमा लगानी विस्तार गर्दै आएको छ। यसले कम्पनीलाई आर्थिक रूपमा थप सुदृढ बनाउने विश्वास गरिएको छ।

एशियन लाइफ इन्स्योरेन्स कम्पनी लिमिटेडले १७ औं वार्षिकोत्सवको अवसरमा सम्पूर्ण बीमित वर्ग, व्यवसायिक अभिकर्ता, नेपाल बीमा प्राधिकरण, नियमनकारी निकाय, कर्मचारी, शेयरधनी, सञ्चालक समिति, व्यवसायिक साझेदार, सञ्चारकर्मी तथा शुभेच्छुकहरूप्रति हार्दिक कृतज्ञता व्यक्त गरेको छ। साथै, भविष्यमा अझ सरल, प्रभावकारी तथा विश्वसनीय सेवा प्रदान गर्ने प्रतिबद्धता व्यक्त गरेको छ।

कम्पनी तथा लहान शाखाले सबै ग्राहक, अभिकर्ता तथा सरोकारवालाहरूलाई १७ औं वार्षिकोत्सवको अवसरमा मंगलमय शुभकामना व्यक्त गरेको छ।