लहानमा उप प्रमुख महताेमाथि कुटपिट, सात दलको विरोध र कारबाहीको माग

सितल साह ,सिरहा लहान, १६ चैत्र २०८१ – लहान नगरपालिकामा उप प्रमुख राम चलितर महतोमाथि दुर्व्यवहार, गालीगलौज तथा हातपात भएको घटनाप्रति सात प्रमुख राजनीतिक दलहरुले गम्भीर ध्यानाकर्षण जनाउँदै कडा विरोध जनाएका छन्।

बिहिवार बिहान करिब ११:२५ बजे लहान नगरपालिकाको कार्यकक्षमा कार्यरत उप प्रमुख महतोमाथि नगर प्रमुख महेश चौधरीको निर्देशनमा हमला भएको सात दलको दाबी छ। घटनामा संलग्न लहान नगरपालिका वडा नं. २२ का वडा अध्यक्ष श्याम अधिकारी (थारु) सहित केही अन्य व्यक्तिहरुलाई कानूनी कारबाहीको माग गरिएको छ। सात दलले जारी गरेको संयुक्त विज्ञप्तिमा कानूनी राज्यको उपहास गर्दै नगरपालिकामा खुलेआम आक्रमण गरिनु दुर्भाग्यपूर्ण भएको उल्लेख गरिएको छ। साथै, नेपाली कांग्रेस लहान नगर सचिवद्वारा जारी गरिएको विज्ञप्तिलाई भ्रामक भन्दै जनतालाई भ्रमित पार्ने प्रयासको रूपमा आरोप लगाइएको छ।

उप प्रमुख महतोमाथि ज्यान मार्ने नियतका साथ आक्रमण भएको भन्दै दोषीहरूमाथि छानबिन गरी कानूनी कारबाही गर्न प्रहरी प्रशासनसँग जोडदार माग गरिएको छ। दोषीमाथि कारबाही नभए सात दलले कडा आन्दोलन गर्ने चेतावनी दिएका छन्। उनीहरूको अनुसार, यदि दोषीमाथि तत्काल कारबाही प्रक्रिया अगाडि नबढाएमा सात दल संयुक्त रूपमा संघर्षका कार्यक्रम घोषणा गर्न बाध्य हुनेछन्, जसबाट हुने सम्पूर्ण क्षतिको जिम्मा प्रशासनले नै वहन गर्नुपर्नेछ।

सात दलको साझा विरोधपछि स्थानीय प्रशासन र प्रहरी प्रशासन घटनाबारे अनुसन्धान गर्ने तयारीमा छन्। नगरपालिकामा भएको यो घटना स्थानीय राजनीति र प्रशासनिक संरचनामा ठूलो प्रभाव पार्ने अनुमान गरिएको छ।