औरहीमा झुठो आरोप–प्रत्यारोप ।।।

विनोद मण्डल, सिराहा, चैत्र ७ – सिराहा जिल्लाको औरही गाउँपालिकामा सार्वजनिक जग्गा खाली गराउने विषयलाई लिएर विभिन्न आरोप–प्रत्यारोप भइरहेका छन् । तर, स्थानीयले भने कसैलाई पनि अपहेलित नगरिएको स्पष्ट पारेका छन् । नेपाल सरकारको संसदमा औरहिमा दलितमाथि अमानविय ब्यबहार भएको भन्दै विभिन्न माननीय ज्यूहरुले आवाज उठाए पनि त्यसमा कुनै सत्यता नभएको स्थानियको भनाई रहेको छ ।

औरही गाउँपालिकाको स्वामित्वमा एक बिगाहा भन्दा बढी ऐलानी जग्गा रहेको छ । सोही जग्गा खाली गराउनका लागि पालिकाले २०८१ कार्तिक २७ गते पहिलो पटक ३५ दिने सार्वजनिक सूचना प्रकाशन गरेको थियो । त्यसपछि क्रमशः २०८१ पुस २४ गते दोश्रो पटक १५ दिने सूचना र २०८१ माघ २ गते तेस्रो पटक ३ दिने सूचना जारी गरेको थियो । सोही अनुसार, उक्त ऐलानी जग्गा हडपेका १५/१६ जनालाई पत्र समेत काटिएको थियो ।

यस क्रममा, स्थानीय दीपक मल्लिकले २०८१ फागुन ११ गते पालिकाको स्वामित्वमा रहेको जग्गाबाट अन्यत्र बसाइँ सर्ने सहमति जनाउँदै मञ्जुरीनामा दिएका थिए । पालिकासँग यस सम्बन्धी स्पष्ट प्रमाणहरू रहेको छ ।

यसबाहेक, दीपक मल्लिक बस्दै आएको स्थानबाट कुनै पनि माटो अन्यत्र हटाइएको छैन, बरु त्यहाँ रहेको माटो नजिकै रहेको देवस्थलमा प्रयोग गरिएको देख्न सकिन्छ ।

यसैबीच, हुलाकी राजमार्गको दक्षिणी छेउ, औरही गाउँपालिका वडा नं ५ मा दीपक मल्लिकका लागि स्थानीयले नयाँ बस्नयोग्य घर निर्माण गरिदिएका छन् । दीपक मल्लिक स्वयंले आफूलाई कसैले पनि दबाब नदिएको बताएका छन् ।

अर्कोतर्फ, औरहीमा विष्णु महायज्ञ तयारीको चरणमा पुगेको छ । स्थानीय समुदायद्वारा यो महायज्ञका लागि मठ–मन्दिरहरूको निर्माण कार्य माघ महिनादेखि नै निरन्तर चलिरहेको छ ।

यस घटनालाई लिएर केही व्यक्तिहरूले अनावश्यक रूपमा झुठो आरोप–प्रत्यारोप गरिरहेको स्थानीयको भनाई छ । पालिकाले ऐलानी जग्गा व्यवस्थापनका लागि कानुनी प्रक्रियाअनुसार अघि बढाएको बताएको छ ।

विभिन्न हिसाबले पालिका अध्यक्ष र विष्णु महायज्ञका बाबा फरार भएको आरोप लगाएका छन् तर ती सबै गलत रहेको छ । यस ठाउँमा कसैलाई कुनै किसिमको अपहेलना गरिएको छैन । उक्त ठाउँ भनिए जस्तो माटो पनि फालिएको छैन ।

स्थानीयले सांसदहरु , पत्रकारहरु ,विभिन्न संघ संस्थाका प्रतिनिधिहरु, मानव अधिकारकर्मी लगायतलाई स्थलगत निरीक्षण गर्दै वस्तु स्थितिको वास्तविकता बुझ्न आग्रह गरेका छन ।