धनगढीमाई नगरपालिकाको १४औं नगरसभा सम्पन्न, समृद्धिको यात्रामा सबैलाई साथ दिने प्रतिबद्धता।

सितल साह ,सिरहा ,धनगढीमाई , १० असार ०८२ ।।
धनगढीमाई नगरपालिका, सिरहा — आ.व. २०८२/८३ का लागि प्रस्तावित नीति तथा कार्यक्रम प्रस्तुत गर्दै धनगढीमाई नगरपालिकाको १४औं नगरसभा मंगलबार भव्यताका साथ सम्पन्न भएको छ। कार्यक्रमको अध्यक्षता नगर प्रमुख शिवशंकर महतोले गरेका थिए भने प्रमुख अतिथि नेपाली कांग्रेसका जिल्ला सभापति एवं संविधान सभा सदस्य रामचन्द्र यादव रहेका थिए।

कार्यक्रममा विशिष्ट अतिथिका रूपमा पूर्व मेयर हरिनारायण चौधरी, वर्तमान उपमेयर संगिता चौधरी, पूर्व उपमेयर फुलकुमारी श्रेष्ठ, प्रमुख प्रशासकीय अधिकृत धिरेन्द्र यादव, सबै १४ वटै वडा अध्यक्ष, कार्यपालिका सदस्य, राजनीतिक दलका प्रतिनिधिहरु, बुद्धिजीवी, समाजसेवी, पत्रकार तथा नगरवासीको उल्लेखनीय उपस्थिति रहेको थियो।

नगर उपप्रमुख संगिता चौधरीले आगामी आर्थिक वर्षको नीति तथा कार्यक्रम सार्वजनिक गर्दै नगरपालिकाको समग्र विकासका लागि ‘समृद्ध धनगढीमाई नगरपालिका हाम्रो शान, पूर्ण सरसफाईयुक्त नगरपालिका हाम्रो अभियान’ भन्ने मूल नारासहित बजेट प्रस्तुत गरिन्।

उनले नगरबासीको विकास आकांक्षा र सम्भावनालाई कार्यान्वयन योग्य योजना र कार्यक्रममार्फत具 मूर्तरूप दिने प्रतिवद्धता जाहेर गरिन्। उनले विकासको समन्वय, सामाजिक सन्तुलन, र प्राविधिक दृष्टिकोणलाई प्राथमिकता दिँदै विभिन्न चुनौतीलाई अवसरको रूपमा लिई समृद्धिको बाटोमा अगाडि बढ्ने दृढता व्यक्त गरिन्।

प्रमुख अतिथि रामचन्द्र यादवले नगरपालिकामा ठोस योजना सहित सबै दलको सहभागिता आवश्यक रहेको धारणा राखे। उनले जातीय विभाजनभन्दा माथि उठेर समावेशी राजनीतिमा नगर प्रमुखले नेतृत्व लिनुपर्ने उल्लेख गरे। नगरका बेथितिहरूप्रति कडा आलोचना गर्दै यादवले विकासका लागि व्यावहारिक सुझावसमेत दिएका थिए।

नगर प्रमुख शिवशंकर महतोले नगरसभा समापन मन्तव्यमा आफूबाट भएका कमजोरीलाई आत्मसात गर्दै, सभाबाट उठेका सवालहरूको सम्बोधन गर्ने दृढता व्यक्त गरे। उनले समावेशी, जवाफदेही र पारदर्शी प्रशासनमार्फत नगरको भविष्य उज्यालो बनाउने अठोट दोहोर्‍याए।

नगरसभाको प्रारम्भ राष्ट्रिय गान र मौन धारणबाट गरिएको थियो भने सुरक्षाकर्मी, पत्रकार, विभिन्न शाखा प्रमुख र कर्मचारीको सक्रिय सहभागिता कार्यक्रमलाई अझ भव्य बनाएको थियो।

कार्यक्रम भव्य र सभ्य वातावरणमा सम्पन्न भएको नगरपालिकाले जनाएको छ। नीति तथा कार्यक्रमले पूर्वपश्चिम लोकमार्ग, चुरे क्षेत्रको विशेषता, कृषि, सहकारी र खनिज स्रोतको उपयोग गर्दै समृद्धिको मार्ग पहिचान गर्ने बताइएको छ।

नगरपालिका विकासको यात्रामा ऐतिहासिक, भौगोलिक र सांस्कृतिक पहिचानलाई संरक्षण गर्दै सन्तुलित सेवा प्रवाहमा प्रतिबद्ध रहेको स्पष्ट गरिएको छ।