रींकु सदा प्रकरणमा पन्चायत गरी मिलाउने सहित ८ जना पक्राउ ४ जना अझै फरार।।

सितल साह फाल्गुन २३।। सिरहा जिल्लाको नवराजपुर गाउँपालिका–१ भगवतीपुरकी १७ वर्षीया रिंकुकुमारी सदाको रहस्यमय मृत्यु प्रकरणले नयाँ मोड लिएको छ। प्रारम्भमा आत्महत्या मानिएको घटनामा सामूहिक बलात्कारपछि हत्या भएको आशंका बलियो बन्दै गएपछि प्रहरीले अनुसन्धानलाई तीव्र बनाएको छ।

माघ ३० गते राति करिब ७ बजे किशोरी आफ्नै घरको कोठामा बाँसको बलोमा झुण्डिएको अवस्थामा फेला परेकी थिइन्। घटनाबारे राति ८:२५ बजे इलाका प्रहरी कार्यालय महेशबारीलाई जानकारी गराइएपछि प्रहरी टोली तत्काल घटनास्थलमा पुगेको थियो। घटनास्थल सुरक्षित राखी प्रारम्भिक अनुसन्धान गरिएको थियो। मृतककी आमा, ठूलो बुबा, स्थानीय वडाध्यक्ष लगायत आफन्तहरू उपस्थित भए पनि कसैले पनि आत्महत्या बाहेकको कुनै अर्को कारण बताउन चाहेनन्।

तर, भोलिपल्ट माघ ३१ गते मृतकका ठूलो बुबाले गाउँकै एक युवकविरुद्ध आत्महत्या दुरुत्साहनको आरोपमा जाहेरी दिएपछि अनुसन्धानले नयाँ मोड लियो। प्रहरीले युवकविरुद्ध मुद्दा दर्ता गरी पक्राउ अनुमति लिएर खोजी सुरु गर्यो। अनुसन्धानकै क्रममा प्रहरीले चौंकाउने तथ्य फेला पारेको छ। मृत्युअघि माघ २९ गते गाउँमा पञ्चायती बसेको थियो। सोही पञ्चायतीले मृतक र एक युवकलाई उपस्थित गराई सोधपुछ गरेको थियो। त्यसक्रममा युवकको परिवारलाई किशोरीको परिवारलाई रु. १,५१,००० क्षतिपूर्ति तिर्नुपर्ने निर्णय सुनाइएको थियो। पछि युवकका परिवारको आग्रहमा रकम घटाएर रु. १,४०,००० मा सहमति कायम भएको खुलेको छ।

घटनाको गम्भीरता बढ्दै गएपछि प्रहरीले मृतकको शवलाई बीपी कोइराला स्वास्थ्य विज्ञान प्रतिष्ठान, धरानमा पोस्टमार्टमका लागि पठायो। फागुन ३ गते शव परीक्षण सम्पन्न भएपछि मृतकको परिवारले शव बुझेर अन्त्येष्टि गरेको थियो। तर, फागुन ४ गते सञ्चारमाध्यमहरूमा सामूहिक बलात्कारपछि हत्या भएको र गाउँस्तरबाट पञ्चायती मिलापत्र गराउने प्रयास भएको समाचार सार्वजनिक भएपछि प्रहरी अनुसन्धान अझै गहिराइमा पुग्यो।

प्रदेश प्रहरी कार्यालय जनकपुरबाट वरिष्ठ अधिकारीहरूको टोली घटनास्थलमा पुगेर थप अनुसन्धान थालेपछि मृतककी आमाले फागुन ८ गते ८ जनाविरुद्ध अपहरण, सामूहिक बलात्कार र हत्या गरेको आरोप लगाउँदै पूरक जाहेरी दिएकी थिइन्।

प्रहरीले अनुसन्धानलाई तीव्रता दिँदै फागुन ११ गते चन्देश्वर मण्डल, राम विनोद मण्डल, र कमलेश कुमार दासलाई पक्राउ गर्यो। उनीहरूलाई मुलुकी अपराध संहिता, २०७४ को दफा २२७ क (करणी सम्बन्धी कसुरमा मिलापत्र गर्न वा गराउन नहुने) अन्तर्गत मुद्दा अघि बढाइएको छ।

फरार अभियुक्तहरूको खोजी जारी राख्दै जाँदा प्रहरीले फागुन २१ गते मुख्य अभियुक्तलाई नियन्त्रणमा लियो। त्यसपछि फागुन २३ गते थप चार जना— वडा सदस्य नथुनी साह, राम कृपाल मण्डल, बिन्देश्वर साह, र राजेन्द्र मण्डललाई पक्राउ गरिएको छ। हालसम्म ८ जना पक्राउ परिसकेका छन् भने अन्य फरार प्रतिवादीहरूको खोजी भइरहेको छ।

जिल्ला प्रहरी कार्यालय, सिरहाले शुक्रबार पत्रकार सम्मेलन गर्दै घटनाका अभियुक्तहरूलाई सार्वजनिक गरेको छ। प्रहरीले घटनाका दोषीहरूलाई कानुनी दायरामा ल्याउन कुनै कसर बाँकी नराख्ने प्रतिबद्धता जनाएको छ।