लहानमा गाउँ ब्लक जग्गा फुकुवाको माग गर्दै मोटरसाइकल र्‍यालीसहित धर्ना

सितल साह , सिरहा , माघ ३० । लहान नगरपालिका-२४ का स्थानीयहरू गाउँ ब्लक जग्गा फुकुवाको माग गर्दै मालपोत कार्यालय अगाडि आन्दोलित भएका छन्। आन्दोलनमा युवा नेता उमेश यादवको सक्रिय उपस्थिति रहेको थियाे भने लहान नगरपालिकाका मेयर महेश चौधरीले पनि खुलेर समर्थन जनाएका छन्।

आन्दोलनलाई थप सशक्त बनाउन लहान नगरपालिका-२४ बाट मोटरसाइकल र्‍याली निकालिएको थियो। स्थानीय युवा, संघर्ष समितिका प्रतिनिधि तथा प्रभावित नागरिकहरूको सहभागितामा निकालिएको र्‍याली मालपोत कार्यालयको प्राङ्गणमा पुगेर कोणसभामा परिणत भएको थियो। कोणसभापछि प्रदर्शनकारीहरूले कार्यालय अगाडि धर्ना दिएका छन्।

गाउँ ब्लक जग्गा संघर्ष समितिले लामो समयदेखि जग्गा फुकुवाको माग गर्दै आएको छ। संघर्ष समितिका संयोजक अरुण केसीले लहान नगरपालिकाका २४ वटै वडाका प्रभावित स्थानीयलाई आन्दोलनमा सहभागी हुन आह्वान गरेका छन्।

मालपोत कार्यालयका प्रमुख अर्जुन कुमार मण्डलले नापी कार्यालयले पठाएको गाउँ ब्लक जग्गाको सेस्रता (री-कर्ड) अध्यावधिक गरी कम्प्युटर प्रणालीमा इन्ट्री गर्ने प्रक्रिया अघि बढाइरहेको बताएका छन्। तर, स्थानीयवासीहरूको मुख्य चिन्ता भने इन्ट्री प्रक्रिया कहिले पूरा हुन्छ भन्ने हो।

आन्दोलनमा लेखापढी व्यवसायीहरूको समर्थन पनि जुटेपछि मालपोत कार्यालयको नियमित कामकाज ठप्प भएको छ। कर्मचारीहरू कार्यालयमै भए पनि सेवाग्राहीहरूले कुनै पनि काम गराउन नसक्ने अवस्थामा पुगेका छन्। उपमेयरदेखि वडा अध्यक्षसम्म स्थानीयहरूसँगै धर्नामा बसेका छन्, जसले गर्दा आन्दोलन झनै बलियो बनेको छ। स्थानीयहरूले आफ्नो माग पूरा नभएसम्म संघर्ष जारी राख्ने चेतावनी दिएका छन्।