काली मन्दिरका पुजारीमाथि निराधार आरोपको विरुद्ध पत्रकार सम्मेलन, मन्दिरको पवित्रता संरक्षणको माग ।।

कार्तिक ११, सिराहा । सिराहा जिल्लाको धनगढीमाई नगरपालिका–५, गोठ चौकस्थित काली मन्दिरका पुजारी दुखी ठाकुरले आफ्नो सन्देश सार्वजनिक गर्न आज मन्दिर परिसरमै पत्रकार सम्मेलनको आयोजना गरेका छन् ।

धार्मिक आस्थाको केन्द्र मानिने काली मन्दिरमा भक्तजनहरू भाकल पूरा भएपछि स्वेच्छाले भेटी र दान गर्ने परम्परा रहेको छ । लामो समयदेखि निःशुल्क पूजापाठ गर्दै आएका पुजारी ठाकुरलाई केही व्यक्तिले मानसिक तनाव दिने गरेको र आधारहीन आरोप लगाउँदै आएको बताइएको छ ।

पुजारी ठाकुरले आरोपहरूको खण्डन गर्दै मन्दिरमा आउने भक्तजनहरूबाट जबरजस्ती कुनै दान वा भेटी नलिएको स्पष्ट पार्दै आए । दुःख र संकटमा परेका भक्तजनहरूको धार्मिक भावनामा सहयोग पुर्याउने उद्देश्यले मन्दिरमा नियमित पूजापाठ गर्दै आएको ठाकुरले बताए ।

२० वर्षदेखि काली मन्दिरमा पूजा–अर्चना गर्दै आएका ठाकुर एक धार्मिक व्यक्तित्व हुन्, जसले नेपालको संविधानअनुसार आफ्नो धर्मको रक्षा गर्न पाउने अधिकारको अभ्यास गर्दै आएका छन् । ठकुरका अनुसार, मन्दिरप्रति बढ्दो जनआकर्षण र विश्वासका कारण केही व्यक्तिहरूले व्यक्तिगत रिसिबी साध्न गलत हल्ला फैलाउन थालेपछि आफूले सत्य उजागर गर्न पत्रकार सम्मेलनको सहारा लिनु परेको बताए ।

उक्त पत्रकार सम्मेलनमा एक स्थानीय पत्रकारले पुजारीसँग २० हजार रुपैयाँ लिएको आरोप लगाउँदै फिर्ताको मागसमेत गरेका छन्, जसले मन्दिरको पवित्रता र धार्मिक आस्थामाथि प्रश्नचिन्ह खडा गरेको छ ।

धार्मिक र सांस्कृतिक धरोहरको रूपमा रहेको काली मन्दिरको पवित्रता कायम राख्न र यसको संरक्षण गर्न आजको आवश्यकता महशुस गरिएको छ ।