औषधी व्यवसायी संघ मधेस प्रदेशका पदाधिकारीको पदभार ग्रहण कार्यक्रम लहानमा सम्पन्न ।।

सितल साह, लहान, सिरहा, माघ १०।। मधेश प्रदेश औषधि व्यवसायी संघका नवनिर्वाचित पदाधिकारीहरूको पदभार ग्रहण कार्यक्रम सिरहाको लहानस्थित मारवाडी सेवा सदनमा भव्य रूपमा सम्पन्न भएको छ। औषधि व्यवसायलाई व्यवस्थित र मर्यादित बनाउन प्रतिबद्ध महासंघको यस समारोहमा विभिन्न अतिथि र सरोकारवालाहरूको उल्लेखनीय सहभागिता रहेको थियो।

कार्यक्रममा प्रमुख अतिथिका रूपमा औषधि व्यवसायी संघका केन्द्रीय अध्यक्ष प्रकाश कुमार खण्डवालले संघको महत्त्वपूर्ण जिम्मेवारीलाई थप प्रभावकारी बनाउनेतर्फ नवनिर्वाचित पदाधिकारीहरूको ध्यानाकर्षण गराउनुभयो। विशिष्ट अतिथिहरूमा लहान नगर प्रमुख महेश चौधरी, उद्योग वाणिज्य संघ सिरहा लहानका अध्यक्ष विकास सारडा, वडा नं.-७ का वडा अध्यक्ष रामऔतार शर्मा र मधेश प्रदेशका आठवटै जिल्लाका औषधि व्यवसाय संघका अध्यक्षहरूको उपस्थिति रहेको थियो। औषधि व्संयवसायी संघका पूर्व पदाधिकारी, खुद्रा तथा थोक बिक्रेता, पत्रकार, र अन्य सरोकारवालाहरूकाे उपस्थितिले कार्यक्रमलाई अझ भव्य बनाएका थिए।

पदभार ग्रहण समारोहको मुख्य आकर्षण नवनिर्वाचित पदाधिकारीहरूको शपथ ग्रहण रह्यो। निर्वाचन आयोगका प्रतिनिधि तथा अधिवक्ता राजदेव यादवले नवनिर्वाचित पदाधिकारीहरूलाई शपथ ग्रहण गराउनुभयो। अध्यक्षमा शिवनाथ सिंह, उपाध्यक्षमा शम्भु कुमार भट्टराई र अजय कुमार यादव, महासचिवमा पप्पु झा, कोषाध्यक्षमा सुशील कुमार, सचिवमा नन्दी साह र सहायक कोषाध्यक्षमा श्यामसुन्दर साहले औपचारिक रूपमा पदभार ग्रहण गर्नुभयो। सदस्यहरूमा किशोर साह, गणेश साह, मन्दिरा भट्टराई, अभिनाश पाण्डे, अजय कुमार झा, विजय कुमार साह, र प्रभु प्रसाद सोनारको पनि चयन भएको छ।

कार्यक्रममा वक्ताहरूले औषधि व्यवसायको सुधार, मर्यादा र व्यवस्थापनलाई थप सुदृढ बनाउन महासंघको भूमिकाको महत्त्वमा जोड दिएका थिए। एक व्यवसायीले औषधि पसलहरूबाट बीमाको औषधि बिक्रीको सुविधा उपलब्ध गराउनुपर्ने माग राख्दै नवनिर्वाचित अध्यक्ष र महासचिवलाई यसबारे प्रदेश सरकारसँग पहल गर्न आग्रह गरे।

कार्यक्रमको सञ्चालन जानुका पराजुलीले गर्नु भएको थियो भने सभाध्यक्षता सिरहा जिल्ला अध्यक्ष सन्तोष अग्रवालले गर्नुभएको थियो। कार्यक्रममा सहभागी अतिथि, व्यवसायी, र पत्रकारहरूले नवनिर्वाचित पदाधिकारीहरूको आगामी जिम्मेवारीप्रति विश्वास व्यक्त गरेका थिए। नव निर्बाचित पदभार ग्रहण गर्नु भएकाे सबैलाई प्रमाणपत्र बितरण गर्दै उपस्थिति प्रमुख अतिथि , बिशिस्ट अतिथि ,पत्रकार लगायत पदाधिकारीहरुलाई  मायाकाे चिनाे र खाद्दा लगाई सम्मान समेत गरेका थिए।

नवनिर्वाचित अध्यक्ष शिवनाथ सिंहले औषधि व्यवसायलाई मर्यादित, पारदर्शी, र व्यवस्थित बनाउन आवश्यक सबै पहल गर्ने प्रतिबद्धता व्यक्त गर्नुभयो। महासंघको यो समारोहले औषधि व्यवसायको विकास र व्यवसायीहरूको अधिकार सुनिश्चित गर्न महत्वपूर्ण मार्गचित्र तयार गर्ने विश्वास गरिएको छ।