पत्रकारमाथि प्र.अ.देबेन्द्र यादबकाे दुर्वयव्हार महासंघ द्वारा कार्वाहीकाे माग।।

माघ २६ ।। सिरहाको लहान नगरपालिका-१४ स्थित बस्तिपुर माध्यमिक विद्यालयमा विद्यार्थीहरूलाई चार दिन पुरानो बासी बुनिया खुवाइएको विषयमा रिपोर्टिङ गर्न गएका पत्रकारसित दुर्व्यवहार भएको छ।

मिति २०८१ माघ २४ गते लहान टुडे राष्ट्रिय दैनिकका सम्पादक तथा पत्रकार सितल कुमार साह विद्यालयमा विद्यार्थीहरूको दिवा खाजा सम्बन्धी अनुगमन तथा रिपोर्टिङ गर्न पुगेका थिए। तर, विद्यालयका प्रधानाध्यापक देवेन्द्र यादवले उनीमाथि दुर्व्यवहार गरेको पत्रकार महासंघ सिरहा शाखाले जनाएको छ।

विद्यालयमा विद्यार्थीहरूलाई वितरण गरिने दिवा खाजामा अनियमितता भएको गुनासो अभिभावकहरूले गरेका थिए। चार दिन पुरानो बुनिया खुवाइएको सूचना पाएपछि पत्रकार साह सोही विषयमा रिपोर्टिङ गर्न विद्यालय पुगेका थिए। तर, रिपोर्टिङका क्रममा प्रधानाध्यापक यादवले असहयोग गर्दै पत्रकार साहमाथि दुर्व्यवहार गरेको प्रत्यक्षदर्शीहरूले बताएका छन्।

नेपाल पत्रकार महासंघ, सिरहा शाखाले घटनाप्रति गम्भीर ध्यानाकर्षण भएको जनाउँदै पत्रकारमाथि भएको दुर्व्यवहारको कडा भर्त्सना गरेको छ। महासंघले पत्रकारिताको सम्मान गर्दै प्रधानाध्यापक यादवमाथि तत्काल आवश्यक कारबाही गर्न सम्बन्धित निकायसँग जोडदार माग गरेको छ।

नेपाल पत्रकार महासंघले पत्रकारहरूलाई सुरक्षित रूपमा आफ्नो पेसागत जिम्मेवारी निर्वाह गर्न दिनु पर्नेमा जोड दिएको छ। पत्रकारमाथि कुनै पनि प्रकारको अवरोध प्रेस स्वतन्त्रतामाथि प्रहार भएको महासंघको निष्कर्ष छ।घटनाको विस्तृत अनुसन्धान हुनुपर्ने माग पनि उठिरहेको छ।