सितल साह ,लहान,सिरहा, ०८२ भदौ १५ । लहान नगरपालिकामा लामो समयदेखि चल्दै आएको विवाद आज चरमोत्कर्षमा पुगेको छ। उप–प्रमुख रामचलितर महतोले प्रमुख प्रशासकीय अधिकृत जयकान्त झाको कार्यकक्षमा तालाबन्दी गरेपछि नगरपालिका राजनीतिक र प्रशासनिक रुपमा थप तनावपूर्ण बनेको हो।
उप–प्रमुख महतोले आरोप लगाउँदै भने, “प्रमुख प्रशासकीय अधिकृत झा ले बारम्बार मेरो अधिकार हनन गर्दै आएका छन्। मलखाध वितरणको विषयमा गरेको निर्णयलाई उल्ट्याउने, उप–प्रमुखसँग कुनै समन्वय नगरी बैठकै नबसी मेराे अध्यक्षताको कागजात तयार गरी हस्ताक्षरका लागि कर्मचारीलाई पठाएका थिए जुन नियम र कानुन बिपरित रहेकाे छन । अधिकृत झा नगरप्रमुखको ईसारामा मात्रै काम गर्ने र भ्रष्टाचार–कमिसनको खेलमा संलग्न हुने गतिविधि बारम्बार हुँदै आएको छ।” महतोका अनुसार लोकतान्त्रिक अभ्यास र सहकार्यको भावना कमजोर पार्ने खालका यी गतिविधि अब सहन नसकिने भएपछि तालाबन्दीको बाटो लिनु परेको हो।
तालाबन्दीको क्रममा स्थानीय राजनीतिक दलका नेता, कार्यकर्ता, किसान तथा नागरिकहरू समेत उपस्थित थिए। तर केही क्षणमै वडा नं.–७ का अध्यक्ष रामअवतार शर्माको निर्देशनमा नगर प्रहरीहरूले झाको कार्यकक्षमा लगाइएको ताला जबर्जस्ती फुटाएर ढोका खोलिदिए।
यस घटनाको प्रतिशोधस्वरूप उप–प्रमुखकै कार्यकक्षमा पनि तालाबन्दी भयो। मलखाध वितरण प्रक्रियामा उप–प्रमुखले भाडभैलो गरेको भन्दै वडा अध्यक्षहरूको एक टोलीले प्रेस विज्ञप्ति जारी गर्दै उनको कार्यकक्षमा तालाबन्दी गरे। उनीहरूले उप–प्रमुख किसानविरोधी भएको आरोप लगाउँदै नारा समेत लगाएका थिए।
स्थानिय नेता रामअवतार महतोले भने, “उप–प्रमुखले प्रमुख प्रशासकीय अधिकृतको कार्यकक्षमा ताला लगाएकाे निहुँमा प्रतिशोधको भावना स्वरूप उनकाे कार्यकक्षमा पनि तालाबन्दी गरिएको हो।” उनले थपे, “अधिकार मिच्दा मुख नखोल्ने कतिपय अध्यक्षहरू बजेट र प्रलोभनका कारण खुलेरै उप–प्रमुखविरुद्ध लागेका छन्।”
जसपा नेपालकै वडा अध्यक्ष रासलाल रायले आफ्नै पार्टीका उप–प्रमुखको कार्यकक्षमा तालाबन्दी गर्न पुगेका साथीहरूलाई देख्दा आफूलाई दुःख लागेको टिप्पणी गरेका छन्।
यी गतिविधिहरूका कारण हाल लहान नगरपालिकामा तनावकाे बाताबरण सृजना भएकाे छन । विकास निर्माण, सार्वजनिक सेवा तथा दैनिक प्रशासनिक प्रक्रियामा समेत प्रभाव पार्न सक्ने गतिबिधि देखेर आम नागरिक निराश बनेका छन्। स्थानीयवासीहरूले भने, “जनताले समस्या समाधान र विकासका लागि कुर्सीमा पठाएका जनप्रतिनिधिहरू आपसी झगडा र शक्ति संघर्षमा मुछिनु लाजमर्दो कुरा हो।”
बुद्धिजीवी, समाजसेवी तथा स्थानीय नेतृत्वहरूले तत्काल दुवै पक्षबीच सहमति कायम गरी नगरपालिकाको कामकाज सहज बनाउन सुझाव दिएका छन्। तर, तत्कालको अवस्था हेर्दा लहान नगरपालिका “भगवान भरोसामा”चलिरहेको देखिएको छ।
